ഒ ടി പി അപാരത

കാലത്തു അഞ്ചര മണിക്ക് എഴുന്നേറ്റു അടുക്കളയിലേക്ക് ഓടുന്നതിനിടയിൽ പതിവില്ലാതെ മൊബൈലിൽ കുത്തികൊണ്ടിരിക്കുന്ന കണവനെ കണ്ടത്. കൊച്ചു വെളുപ്പാൻ കാലത്തു ഇങ്ങേരിതെന്ത് മാന്തി കൊണ്ടിരിക്കുകയാണോ എന്തോ?

നമ്മുടെ പിൻകോഡ് എത്രയാ?

കാലത്തു തന്നെ പിൻകോഡ് ഒക്കെ ചോദിക്കുന്നുണ്ടല്ലോ, ഓൺലൈനായി വല്ലതും വാങ്ങിക്കാനാകും. നാട്ടിൽ എങ്ങാണ്ട് കിടക്കുന്ന ആ കോവിഡിനെ വീട്ടിലെത്തിക്കാൻ ആണോ എന്തോ?😑

673008

സീറോ സീറോ എയിറ്റ്  ആണോ എയിറ്റിൻ അല്ലെ?

അല്ല എട്ടു തന്നെ.

അപ്പോൾ 18 എവിടെയാ?

എനിക്കറിയില്ല , വേണേൽ ഗൂഗിൾ ചെയ്തു നോക്കിക്കോ, എന്തായാലും കുത്തികൊണ്ടിരിക്കയല്ലേ...😏😏


പിന്നെ അനക്കമൊന്നുമില്ല. പെട്ടെന്ന്
അടുത്തു കഴിഞ്ഞ പത്താം ക്ലാസ് മീറ്റിനെ കുറിച്ചു ഓർമ്മ വന്നു. പഴയ വല്ല ലൈനിനും അഡ്രസ്‌ പറഞ്ഞു കൊടുക്കുകയാകുമോ ഇനി? ഏയ് വിശാലമാനസ്‌കയും ആദർശധീരയുമായ നീ അങ്ങനെ ചിന്തിക്കരുത് എന്നാരോ ഉള്ളിൽ നിന്നും പറയുന്നുണ്ട്. എന്നാലും മനസ്സിന് ഒരു ചാഞ്ചാട്ടം. ഫ്രിഡ്ജിൽ നിന്നും പച്ചക്കറി എടുക്കാൻ പോകുന്നതിനിടയിൽ ഒന്നു പാളി നോക്കി.
അയ്യേ, മനസ്സിലെ സംശയരോഗി പിടഞ്ഞു മരിച്ചു പോയി.
 ബെവ്‌ക്യു ആപ്പിൽ കിടന്നു സർക്കസ് കളിക്കുകയാണ് പുള്ളി..
 ഒ ടി പി വരുന്നില്ല..
ഇൻസ്റ്റാൾ ചെയ്യുന്നു, പിൻകോഡ് കൊടുക്കുന്നു. ആപ്പിന് അനക്കമില്ല. അനിൻസ്റ്റാൾ ചെയ്യുന്നു..
പിന്നേം അത് തന്നെ.
അങ്ങനെ
കാത്തിരുന്നു കാത്തിരുന്നു ഒ ടി പി എത്തി. കിട്ടിയ ആക്രാന്തത്തിൽ ഒ ടി പി കൊടുക്കുന്നു.
ദേ കിടക്കുന്നു "ബുക്കിംഗ് സ്ലോട്ട് ടൈം റെസ്ട്രിക്റ്റഡ് ഫ്രം 12പിഎം ടു 7 പിഎം.
"കോപ്പിലെ ഒരു ആപ്പ് ..വെറുതെ മനുഷ്യന്റെ സമയം കളയാൻ.വെറുതെയല്ല മനുഷ്യർ മുഴുവൻ തെറി വിളിക്കുന്നത്."

ഇത്രയും പുറത്തേക്ക് വന്നത്, ഉള്ളിൽ എന്തൊക്കെ വിളിച്ചു എന്നു ദൈവം തമ്പുരാന് അറിയാം.