2014, ജനുവരി 25, ശനിയാഴ്‌ച

ജാലകക്കാഴ്ചകൾ

ഓഫീസിന്റെ മുൻഭാഗത്തെ ജനലിൽ കൂടെ പുറത്തേക്കു നോക്കിയാൽ നിരനിരയായി നീണ്ടുകിടക്കുന്ന ലോറികളും സാധനങ്ങൾ കയറ്റുന്നതിന്റെയും ഇറക്കുന്നതിന്റെയും ബഹളവും ഒക്കെ ആണ് സാധാരണ ആയി കാണുക. മുന്നിലെ കാനറ ബാങ്കിന്റെ സണ്‍ഷെയിഡിലെ പരുന്തിന്കുട്ടിയെ കുട്ടേട്ടൻ ആണ് ഒരു ദിവസം കാണിച്ചു തന്നത്. ചിറകുകൾ ഒതുക്കി സുന്ദരക്കുട്ടൻ ആയി ഇരിക്കുന്ന കുട്ടിക്ക് തീറ്റയുമായി അമ്മ ഇടയ്ക്കിടെ വരും. അതിന്റെ കൊക്കിലെക്കു തീറ്റ വെച്ച് കൊടുത്തു തിരികെ പറന്നു പോകുന്നതിനു മുൻപ് ഒരു കുട്ടി സുരക്ഷിതൻ ആണോ എന്നറിയാൻ ഒരു നിരീക്ഷണം. ഒരു പ്രദക്ഷിണം .അമ്മയുടെ സ്നേഹം , അത് ഇതു തരം ജീവികളിൽ ആയാലും മഹത്തരം തന്നെ.


താഴെ ഉള്ള ഗോഡൌണിൽ രണ്ടാഴ്ച മുൻപാണ്‌  ഒരു കറുത്ത പൂച്ച പ്രസവിച്ചത്.  അരിചാക്കുകൾക്കിടയിൽ നാല് കുട്ടികൾ. മൂന്ന് കറുത്തതും ഒന്ന് ചാര നിറത്തിലുള്ളതും. പഞ്ഞിപോലത്തെ സുന്ദരിക്കുട്ടികൾ.പെറ്റ പെണ്ണിനു ആഹാരം ഓഫീസിലെ  എല്ലാവരും മത്സരിച്ചാണ്‌ കൊടുക്കുന്നത് . ഞാൻ ഇട്ടു കൊടുക്കുന്ന പച്ചക്കറി ചോറു ഒന്ന് മണത്തു നോക്കി 'വായിൽ വെക്കാവുന്ന ഒന്നുമില്ലേ " എന്ന ചോദ്യവുമായി എന്നെ നോക്കി അമ്മപൂച്ച കരഞ്ഞിരിക്കും.ആ ചോറിനു മുകളിലായി  ആരേലും മീൻ കറി ഒഴിച്ച് കൊടുത്താൽ പെട്ടെന്ന് തന്നെ കഴിച്ചു തീർത്തു മക്കളുടെ അടുത്തേക്ക് ഓടും.ഇടയ്ക്കിടെഎല്ലാവരും  പൂച്ചകുട്ടികളെ പോയി നോക്കുന്നതു കൊണ്ടാകണം മക്കളെ സുരക്ഷിതം ആയി വേറെ ഒരു സ്ഥലത്തേക്ക് കടിച്ചു കൊണ്ട് പോകാൻ തുടങ്ങിയത്. കുട്ടികളെ എല്ലാം കൊണ്ടുവെച്ചു തിരിച്ചു വരുന്നതിനിടയിൽ പാണ്ടി ലോറിയുടെ അടിയിൽ ചതഞ്ഞു അരയാനുള്ളതാണ് താൻ എന്ന് അമ്മ പൂച്ച ഓർത്തു കാണില്ല.

ഇപ്പോൾ അമ്മയില്ലാത്ത കുഞ്ഞുങ്ങളുടെ കരച്ചിൽ ആണ് എവിടെയും  . വളർത്തുമൃഗങ്ങൾ പോറ്റാൻ പാടില്ല എന്ന നിയമം ഉള്ളതുകൊണ്ട് എനിക്ക്  അവയെ ഫ്ലാറ്റിലേക്ക് കൊണ്ട് പോകാനും വയ്യ. ചായയും പാലും ഒഴിച്ചു കൊടുക്കാൻ ആളുകള് മത്സരിക്കുകയാണ്. പക്ഷെ ആർക്കും അവയെ വീട്ടിലേക്കു കൊണ്ട് പോകാൻ വയ്യ. ഇന്നലെ കുട്ടികളിൽ ഒരെണ്ണം ഓട്ടോയുടെ അടിയിൽപ്പെട്ടു. ബാക്കിയുള്ളവ അടുത്തുള്ള ചായക്കാരന്റെ പെട്ടിക്കടിയിൽ താല്കാലിക സ്ഥലം കണ്ടെത്തിയിരിക്കുന്നു. നാളെ അതിൽ എത്ര എണ്ണം ബാക്കി ഉണ്ടാകുമെന്നറിയില്ല. അമ്മ ഇല്ലാത്ത കുഞ്ഞുങ്ങൾ എവിടെയും അരക്ഷിതർ തന്നെ.





6 അഭിപ്രായങ്ങൾ:

  1. അമ്മയില്ലാത്ത ഒരു ദിവസം പോലും എന്‍റെ ജീവിതത്തില്‍ ഉണ്ടാവരുത് എന്നാണെന്‍റെ ആഗ്രഹം...., ഹൃദയ സ്പര്‍ശിയായ എഴുത്ത്...

    മറുപടിഇല്ലാതാക്കൂ
  2. അമ്മയില്ലാത്ത കുഞ്ഞുങ്ങള്‍ അരക്ഷിതര്‍ തന്നെ
    അതുപോലെ കുഞ്ഞുങ്ങളില്ലാത്ത അമ്മയും!

    മറുപടിഇല്ലാതാക്കൂ
  3. ആ പൂച്ചകുട്ട്യേളെ വീട്ടീ കൊണ്ടരായിരുന്നില്ലേ..?? :(

    മറുപടിഇല്ലാതാക്കൂ
    മറുപടികൾ
    1. ഫ്ലാറ്റ് നിയമത്തിനു എതിരല്ലേ ...എന്ത് ചെയ്യാം...:(

      ഇല്ലാതാക്കൂ
  4. മനുഷ്യരുടെ കാര്യത്തിലും ഇങ്ങനെതന്നെയല്ലേ സംഭവിച്ചുകൊണ്ടിരിക്കുന്നത്.

    മറുപടിഇല്ലാതാക്കൂ

Thank you for your comments & suggestions :) - suma

മരണത്തിന്റെ തണുപ്പ്

ഉറക്കത്തിൽ ഞെട്ടിയുണർന്നപ്പോളാണ് ഉറങ്ങാതെ കിടക്കയിൽ ഇരിക്കുന്ന ഹരിയെ  കണ്ടത് . എന്താ ഇങ്ങനെ ഇരിക്കുന്നത് , ഉറങ്ങുന്നില്ലേ ? 'ഉറങ്ങാ...