ഒരു ചോദ്യം!

ഒറ്റ ചോദ്യം കൊണ്ടെന്നെ തള്ളിയിട്ടത്
ഭൂതകാലത്തിന്റെ ആഴങ്ങളിലേക്കാണ്
കണ്ടെടുക്കാനാകാത്ത വിധം അമർന്നു പോയ
ഓർമ്മകളെയാണ് ഉണർത്തിയത്
ആഴങ്ങളിൽ നിന്നും കിട്ടിയ
ചിതലരിച്ച പുസ്തകത്താളുകളിൽ
തെളിയുന്നുണ്ട് ചില മുഖങ്ങൾ
മറന്നു പോയെന്നു കരുതിയ പലതും
മറ നീക്കി പുറത്തു വരുന്നുണ്ട്
കാണുന്നുണ്ട് കാലു നിലത്തു
വെക്കാനാകാതെ ഓടിയ ഓട്ടം
ഓർമ്മകളെ കടലിൽ എറിഞ്ഞു
ഓടിയ ഓട്ടമൊക്കെ വെറുതെ
ആയെന്നിപ്പോൾ അറിയുന്നു
 അകലെ മഞ്ഞു  മറക്കുള്ളിൽ
തിളങ്ങുന്ന സൂര്യനെ പോലെ
സൗഹൃദച്ചിരിയിൽ വിടർന്നു നിൽക്കുന്ന
നിന്റെ മുഖം കാണുമ്പോൾ
നിന്റെയീ ചോദ്യം കേൾക്കുമ്പോൾ
'ഇത്രയും കാലത്തിനിടയിൽ
ഒരു പ്രാവശ്യം പോലും കാണണമെന്ന് തോന്നിയില്ലേ'